Arquivo da categoría: Convivencia

COMEZA A SEGUNDA SEMANA DE TRABALLO DO PROXECTO PROFESSIONAL MOBILITY FOR SOCIAL MEDIATORS

FOANPAS

Durante a primeira semana de traballo, os profesionais romaneses coñeceron o Sistema de Servizos Sociais de Galicia, así como o sistema Educativo. Durante a segunda semana, achegaranse ao sistema sanitario e profundarán sobres Servizos Sociais e Educación. Unha visita institucional á Consellería de Traballo e Benestar o mércores, constitúe o punto central dos traballos.

VIGO, 25 DE MAIO DE 2014: Despois dunha xornada inaugural, celebrada o luns 19 na sede da Asociación Diversidades, o martes 20 o grupo de profesionais dos servizos sociais romaneses que participan no Mobility Project desprazáronse a Ferrol para coñecer o traballo de AGAMME contra os malos tratos infantís e para participar nunha xornada organizada polo Centro de Formación e Recursos do Profesorado de Ferrol, cuxo centro era un relatorio da Asociación Diversidades sobre os factores éxito educativo do alumnado xitano en Galicia. O mércores 21 puideron visitar Radio ECCA durante a mañá. Pola tarde foi a quenda para o Programa Na Rúa, da Fundación Juan Soñador. O xoves 22, da man de FOANPAS puideron visitar un Centro Educativo e coñeceron a experiencia dos comedores escolares xestionados polas ANPAS, ademais de participar nunha conferencia de formación para nais e pais. En Romanía non existen asociacións de Pais e Nais de alumnos nos Centros Educativos, polo que esta experiencia resulta en grao sumo enriquecedora. O venres 23 visitaron unha familia romanesa residente en Vigo e coñeceron o seu punto de vista sobre a situación social en Galicia e a súa perspectiva sobre a inclusión social.
O sábado 24, por cortesía da Concellería de Turismo do Concello de Vigo, gozaron dunha viaxe a Cíes.
A semana que resta de programa formativo está repleta de contidos, con visita o luns 26 ao Centro de Saúde de Teis, ao Centro de Emerxencias dás Mulleres de Vigo e a unha sesión de terapia con cans de nenos con dificultades de aprendizaxe. O martes 27 comezará cunha mañá de traballo coa experiencia pedagóxica Colexio Escultor Acuña, para achegarse aos problemas e as potencialidades de aprendizaxe das persoas xordas. Pola tarde, coñecerán a experiencia de AYUVI, dando soporte ás nais para o coidado e a crianza dos seus fillos e fillas.
O mércores 28 visitarán a Xunta de Galicia, onde serán recibidos por responsables da Consellería de Traballo e Benestar, co fin de obter unha visión panorámica dos Servizos Sociais en Galicia e especialmente da Atención a Menores en risco.
O xoves 29 será para o CPI O Toural de Vilaboa, onde a Asociación Diversidades desenvolve unha experiencia pioneira que pretende involucrar aos pais e nais do alumnado xitano na educación dos seus fillos.
A xornada do venres será de avaliación e permitirá pechar acordos de colaboración entre a Asociación Diversidades, e diferentes organizacións romanesas, públicas e privadas, ás que pertencen os profesionais desprazados a Vigo durante este quince días.

Diversidade cultural no curso de Lingua Española

ImaxeUn numeroso grupo de mulleres participa desde o pasado 22 de outubro no curso de lingua española para estranxeiros organizado pola Asociación Diversidades. O Curso realízase de luns a xoves na sede da asociación en horario de 16:00 a 18:00.

Concibido inicialmente pensando na poboación romanesa da cidade de Vigo, o grupo que acabou realizando o curso de Español para estranxeiros foi bastante máis plural na súa configuración, incluíndo persoas de Senegal, Rusia, Ucraína, Brasil, Corea e, por suposto, Romanía.

O curso desenvolve temas da vida cotiá, pensados para a interacción social nos medios máis habituais, nomeadamente aqueles en que as persoas en risco de exclusión procuran alternativas para unha vida máis plena.
Aínda que se traballaron tamén cuestións de comprensión e expresión escrita, especialmente pensadas para aquelas participantes que teñen un maior nivel de lectoescritura na súa lingua natal, o curso está pensado para desenvolver as habilidades de comprensión e expresión oral, determinantes no día a día de calquera persoa.
O curso está constituíndo, ademais, un excelente momento de encontro entre persoas de diferentes culturas que practican, xunto coa lingua, a tolerancia, a convivencia e a construcción dunha sociedade intercultural.

O Leonardo Mobility Project, de novo en Faro de Vigo

Leonardo Mobility Project

De novo o Faro de Vigo volve facerse eco da formación realizada entre a Asociación Diversidades e Dual Smart de Brasov, Rumanía, no marco do Programa Leonardo de Mobilidade da Axencia nacional do programa Leonardo de Rumanía. Esta vez o énfase recae nos programas de mobilidade, máis alá do máis coñecido, o Erasmus.

Leonardo Mobility Project tamén en Faro de Vigo

Tamén Faro de Vigo recolle a nova da visita a FOANPAS dentro do programa formativo do Proxecto de Mobilidade de S.C. DUAL SMART S.R.L, de Brasov, Rumanía. Destaca o modelo de mediación promovido polas Asociacións de Nais e Pais en Vigo como un modelo a seguir no desenvolvemento de novos proxectos e servizos en Rumanía.

Nova andaina do programa Bun Venit

O programa Bun Venit, que tivo unha primeira andaina durante a primavera do presente  2013, volve con forza para o outono, coincidindo coa recepción dun grupo de estudantes de intercambio.
Ademais das accións de mediación coas que se puxo en marcha o proxecto de itinerarios de inclusión, agora éstes van ser reforzados con diferentes accións formativas:

  • Español para estranxeiros
  • Competencias – Clave
  • Comercio 1 (teoría e práctica).

Esta aposta formativa pretende reforzar as capacidades existentes na poboación romanesa de Vigo e facilitar a súa inserción no mercado de traballo.

Un grupo de estudantes rumanos participan nun intercambio con Diversidades

A Asociación Diversidades, recibe este mes de outubro un grupo de estudantes do ámbito do Traballo Social e, especificamente, da mediación intercultural. Procedente de Brasov, en Rumanía, o grupo está integrado por seis persoas, cinco mulleres (das que catro son xitanas) e un home. A organización promotora do intercambio é S.C. DUAL SMART S.R.L., de Brasov.