Category Archives: Novas

Coñecendo Vigo: Sociedade de Acollida 2021

Este luns de entroido, e na liña de aprendizaxe da clase de Sociedade de Acollida, realizamos un percorrido histórico por Vigo, que nos levou a pasear polo centro histórico da cidade. Así tivemos a oportunidade de coñecer os principais monumentos e construcións, como o Sireno, o teatro García Barbón, a Colexiata, a estatua de Xullo Verne…e outros moitos. Finalmente, fixémonos unhas fotos na rúa do Príncipe, ante o MARCO.

O Curso Introdución á Sociedade de Acollida 2021 comezou o pasado 18 de xaneiro e durará ata o 31 de marzo, en horario de 10:00 a 13:00, na sede de UXT-Vigo que colabora coa cesión da aula e contribúe ao cumprimento das medidas de seguridade da acción formativa.

O curso realízase co financiamento da Consellería de Política Social da Xunta de Galicia e o Cofinanciamento do Fondo Social Europeo (O Fondo Social Europeo Inviste no teu Futuro).


Día Internacional da Muller e a Nena na Ciencia

O 11 de febreiro conmemorase a nivel internacional o Día da Muller e a Nena na Ciencia ca finalidade de incentivar o acceso e a participación plena e equitativa das mulleres e nenas na ciencia. Pretende servir como empoderamento de mulleres e nena e como recordatorio de todas as aportacións que estas mesmas teñen feito a longo da historia de forma que nos aproximemos cada vez máis a igualdade de xénero.

No centro de Protección Internacional de Tui decidimos conmemorar este día a través de varias actividades. Unha primeira na que visibilizar a múltiples mulleres que ao longo da historia se dedicaron de forma moi exitosa á ciencia e inventaron obxectos e produtos básicos para o noso día a día no centro:

Colocamos os carteis con cada un dos inventos no lugar do noso centro onde o podemos atopar:

Por outra parte e para finalizar a xornada, tivemos a sorte de contar coa presenza de Marta Pérez Martínez e Elena Couñago Sánchez da Asemblea Feminista Paxaretas quen a través dunha teleconferencia fixeron un percorrido polas aportacións científicas de diversas mulleres ao longo da historia ata acabar relatando a sus propias vivencias e logros dentro do mundo da Ciencia.


Día Internacional contra o Cancro

O 4 de febreiro conmemórase internacionalmente o DÍA CONTRA O CANCRO co obxectivo de visibilizar e crear concienciación sobre unha problemática global que afecta a millóns de persoas ao ano.

No Centro de Protección Internacional de Tui tomamos parte na campaña internacional  #YoSoyYVoyA difundindo a mensaxe e tratando de crear sensibilización no propio centro:

Prestamos especial interese aos factores de risco modificables xa que son sobre os que podemos intervir. Coidar a alimentación, controlar o consumo de alcohol e tabaco e realizar actividade física son accións que todas as persoas, en maior ou menor medida, podemos controlar e que terán un gran impacto positivo na nosa saúde xeral e na prevención do cancro en particular.


Día Internacional dos Dereitos Humanos

Con motivo do Día Internacional dos Dereitos Humanos que se celebra o 10 de decembro para conmemorar que nese mesmo día de 1948 a Asemblea Xeral das Nacións Unidas adoptou a Declaración Universal dos Dereitos Humanos, realizouse un obradoiro a cargo das persoas usuarias do Centro de Acollida de protección internacional.

Nesta charla tivemos a oportunidade de coñecer que son os Dereitos Humanos, a súa historia e características, así como varios exemplos que nos permitiron reflexionar e debater sobre este asunto.


Curso Creación de Empresas

O 4 de decembro foi o último día do Curso de Creación de Empresas no Centro de Solicitantes de Protección Internacional de Tui da Asociación Diversidades, grazas ao profesor Óscar González e á implicación das persoas participantes, puidemos gozar da presentación de interesantes proxectos de emprendemento.


Comezo das festividades de Nadal no Centro de Tui

Coa chegada do mes de decembro no Centro de Tui comezamos coas preparacións e celebracións das festividades de Nadal.

Neste centro conviven persoas de moitos lugares que traen consigo tradición e costumes diversas, isto significa que as festividades de Nadal aquí estenderanse durante mes e medio, dende o primeiro de decembro ata mediados de xaneiro.

A primeira celebración xa tivo lugar o día 1 de decembro no que demos a benvida ao Nadal cunha comida típica de Venezuela elaborada polos/as propios/as usarios/as na que tivemos a sorte de degustar tres platos típicos do Nadal neste país: pan de xamón, hallacas e ensalada de galiña. Foi un momento diferente e distendido que permitiu que todas as persoas que viven no centro máis todas as persoas que conformamos o equipo puideramos coñecer máis das orixes e costumes dos demais, todo acompañado pola  exquisita comida e acolledor ambiente aportado pola decoración elaborada especialmente para esta celebración.

Para proseguir coas preparacións das vindeiras festividades continuamos coa decoración do Centro na que entre todos e todas tratamos de engalanar os espazos comúns para crear un ambiente de festividade, calidez e celebración.

Para iso elaboramos manualmente e con materias reutilizados algunhas decoracións que despois distribuímos polo centro, a maiores doutros adornos tradicionais que xa tíñamos e algúns outros que foron doados.

BO NADAL!


Decorando a árbore de Nadal

Diversidades Acolle cumpre 8 anos

Diversidades nace o 6 de decembro de 2012 co obxectivo de atender os retos da diversidade cultural e da migración, co obxecto de contribuír a crear unha sociedade aberta, inclusiva e tolerante.

Nos primeiros tempos prestamos os nosos servizos nos colexios e nunha pequena oficina no número 9 da rúa Velázquez Moreno, en Vigo.

O 2 de agosto de 2016 comezamos unha nova andaina na nosa oficina actual, en García Barbón 36, 3º.

O 11 de xuño de 2017 a Asociación Diversidades intégrase en Red Acoge, federación de entidades pro-inmigrantes, pasando a denominarse Diversidades Acolle.

En decembro de ese mesmo ano, Diversidades Acolle pasa a integrar a Asociación Española de Escolas de 2ª Oportunidade, como membro do sector educativo.

No segundo semestre de 2018, Diversidades Acolle reorganiza os seus servizos para darlle a súa configuración actual.

O 18 de maio de 2020 abriu as súas portas o noso Centro de Acollida de Familias Refuxiadas de Tui. Con este novo centro cúmpríase un dos soños da nosa organización desde outono de 2015, cando a morte de Aylan Kurdi conmovera a conciencia de todas as persoas de ben, en plena crise humanitaria pola atención ás persoas que fuxían do conflito de Siria.

Hoxe, a Asociación Diversidades Acolle cumpre 8 anos e pretende seguir apostando por unha sociedade aberta, inclusiva e tolerante en medio da pandemia mundial da COVID-19.


25 N – Día Internacional contra a Violencia de Xénero

Con motivo do Día Internacional contra a Violencia de Xénero levouse a cabo no centro de Tui unha actividade pensada para poñer en común os puntos de vista de todas as persoas residentes e o equipo.

Esta actividade permitiu remarcar a gravidade destes sucesos facendo especial fincapé nas distintas formas de violencia existente (visibles e invisibles) e as respostas que podemos dar ante estas. Poñendo especial valor na importancia de recoñecer e dar resposta a estas situacións en todos os ámbitos da vida.


Comezan os traballos de coordinación entre Tui e Vigo

Tui, 13 outubro 2020

Coa intención de mellorar a integración dos itinerarios de inclusión social das persoas solicitantes de protección internacional e de participación plena na vida da nosa sociedade, os equipos de traballo da Asociación Diversidades das nosas sedes de Tui e Vigo mantivemos unha reunión de traballo. O punto forte da sesión foi a posta en común das liñas programáticas desenvoltas en cada localidade, os principais logros acadados ata o presente e as perspectivas de futuro inmediato.

Ademais, tivemos a ocasión de xantar xuntos, para reforzar as interaccións persoais e crear o clima de confianza que nos permita seguir avanzando de cara a unha sociedade máis inclusiva e diversa.


Nenas refuxiadas xogando

Avance do centro de Tui

Tui, 15 de outubro 2020

No mes de abril comezou a nova aventura de Diversidades coa apertura do centro de acollida en Tui! Moito avanzouse… e seguimos avanzando!

No marco do PROXECTO AIA-ACOLLIDA e PROXECTO AIA-E (ACOLLIDA, INTEGRACIÓN E AUTONOMÍA) PARA O EMPREGO, subvencionados pola Dirección Xeral de Integración e Atención Humanitaria, e este último cofinanciado polo Fondo Social Europeo, levamos 6 meses de traballo. Ademais da posta en marcha do centro e todo o labor que conleva a organización e funcionamento diario realizáronse múltiples actividades:

Talleres semanais para unha mellora na integración das persoas residentes no centro:

  • Talleres de contextualización: sistema educativo español, organización do sistema político español, economía doméstica.
  • Talleres de asesoramento: para a procura de vivenda, apertura de conta.
  • Igualdade de xénero e oportunidades.
  • Medio ambiente.

Importante tamén a aprendizaxe de idiomas, levando a cabo talleres de galego e clases intensivas de español para aquelas persoas residentes que o necesitan.

Na área de emprego desenvolvéronse talleres que dotan ás persoas usuarias de recursos e ferramentas necesarias para a mellora da empregabilidade, asesoramento e información para o acceso a formación, ademais de titorías individuais nas cales se establece de maneira conxunta obxectivos e itinerario a seguir cara á procura de emprego.

Sen esquecernos das actividades de lecer como saídas pola contorna de Tui e a realización de festas tradicionais como a noite de San Xoan.

Un proxecto levado con moita ilusión! CONTINUAMOS!